Roberto Karlos karyerasını başa vura bilər

Lent.az-ın məlumatına görə, bu barədə 38 yaşlı müdafiəçinin özü “Rede Bandeirantes”ə açıqlama verib.

Rusiya stadionlarında iki dəfə özünə qarşı irqçi hərəkətin qurbanı olan braziliyalı oyunçu bildirib ki, analoji insidentlər bir daha təkrarlanacağı halda futboldan gedəcəyi istisna deyil. O, iyunun 22-də “Krılya Sovetov”la keçirilmiş son qarşılaşma vaxtı “banan olayı”na toxunub: “Samarada mənə tribunadan banan atılandan dərhal sonra karyeramı bitirməyi düşündüm. Lakin sonradan qalmağı qərara aldım. Lakin belə hal yenə baş versə, qərar verməli olacağam. Həmin anda mən çox məyus idim, özümü gücsüz hiss edirdim. Stadionda çoxlu uşaq var idi. Belə hal futbolda olmamalıdır”.

Qeyd edək ki, “Krılya Sovetov” – “Anji” matçının sonlarında azarkeşlərdən biri tribunadan Roberto Karlosa banan tullayıb. Samara klubu həmin fanat haqda informasiya verəni mükafatlandıracağını açıqlayıb. Banan tullayan şəxs izləmə kamerasının yazılarında tapılıb. Lakin onun şəxsiyyətini hələlik müəyyənləşdirmək mümkün olmayıb.