FİFA vitse-prezidenti istefaya getdi

FİFA vitse-prezidenti Cek Uorner öz istəyi ilə istefa verib. Lent.az-ın məlumatına görə, bu barədə ali futbol qurumunun rəsmi açıqlamasında bildirilir.

Əvvəllər FİFA-nın etika komitəsi Uorneri səlahiyyətlərinin icrasından kənarlaşdırıb. Bu, futbol funksionerinin korrupsiyada ittiham olunmasından sonra baş verib. Uorner öz üzərindən ittihamların götürülməsindən ötrü istefa verməyi daha məqsədəuyğun sayıb. Araşdırmalar davam etsəydi, o, günahkar sayıla, idman təşkilatlarında istənilən fəaliyyətinə isə qadağa qoyula bilərdi. Bu qərar həm də Uornerin siyasi karyerasına zərər vurardı. Çünki o, vətəni Trinidad və Tobaqoda nazir postunu tutur.

Qeyd edək ki, Cek Uorner Karib Futbol İttifaqının üzvlərinə 40 min dollar rüşvət verməkdə ittiham olunur. Rüşvət qarşılığında o, Asiya Futbol Konfederasiyasının prezidenti Məhəmməd bin Həmmamı iyunun 1-də keçirilmiş FİFA prezidenti seçkisində dəstəkləməyi xahiş edib. Bin Həmmam seçkidə hazırkı prezident Yozef Blatterin yeganə rəqibi olub. O, Blatteri də korrupsiyada ittiham edib. Mayın 29-da keçirilmiş FİFA etika komitəsinin iclasında Uorner və bin Həmmam səlahiyyətlərinin icrasından kənarlaşdırılıblar, Blatter isə haqlı çıxıb. Beləliklə, bin Həmmam namizədliyini götürüb və hazırkı prezident alternativsiz qələbə qazanıb.