“Xəzər Lənkəran” Avram Qrantın sabiq komandasına qarşı

Lent.az-ın məlumatına görə, İsrailin Təl-Əviv şəhərini təmsil edən “Makkabi” futbol klubunun əsası 1906-cı ildə qoyulub.

Komanda 20 dəfə İsrail çempionu adını qazanıb, 22 dəfə isə ölkə kubokunu əldə edib. 1996–2000-ci illər ərzində “Makkabi”ni tanınmış məşqçi Avram Qrant çalışdırıb. 2004-2005-ci il mövsümündə bu komanda Çempionlar Liqasının qrup mərhələsində çıxış edib. Bu mövsüm isə “Makkabi” İsrail çempionatını 3-cü pillədə bitirib. Komanda ev oyunlarını 14.700 tamaşaçı tutumu olan “Blumfild” stadionunda keçirir. İsrail təmsilçisinin baş məşqçisi 2011-ci ildən “Makkabi”nin sabiq futbolçusu Motti İvanirdir. 47 yaşlı mütəxəssisin bu təyinatadək son iş yerləri İsrailin 17 və 21 yaşlılardan ibarət yığmaları olub.

Qeyd edək ki, “Xəzər Lənkəran” “Makkabi” ilə ilk oyununu iyulun 14-də Lənkəranda, cavab görüşünü isə bundan bir həftə sonra Təl-Əvivdə keçirəcək.