“Neftçi” Xorvatiya “Dinamo”sunun təklifini rədd etdi

Bu haqda Lent.az-a Azərbaycan çempionunun Mətbuat və İctimaiyyətlə Əlaqələr Departamentinin rəisi Elnur Əşrəfoğlu məlumat verib.

Bu gün İsveçrənin Nyon şəhərində keçirilmiş püşkatma mərasiminə qatılan Əşrəfoğlu bildirib ki, Zaqreb klubunun nümayəndələri “Neftçi”yə rəqib olmalarını narahatlıqla qarşılayıblar. Onlar bir tərəfdən, “ağ-qaralar”ın heyətində Emil Mpenza, Flavinyo, Rodriqinyo və serbiyalı qapıçı Saşa Stamenkoviç kimi ulduz futbolçuların yer almasına, digər tərəfdən, ilk oyunu Zaqrebdə keçirmələrinə elə də xoş yanaşmayıblar: “Xorvatiya klubunun rəsmiləri bizdən ilk görüşü Bakıda keçirməyi xahiş etdilər. Amma mən təbii ki, razılaşmadım. Axı kim bu təkliflə razılaşardı? Çünki ilk oyunu səfərdə keçirmək istənilən komanda üçün əlavə üstünlükdür”.

Qeyd edək ki, ilk oyun 12-13 iyulda, cavab matçı isə 19-20 iyulda baş tutacaq. Görüşlərin konkret tarixi isə hələ müəyyənləşməyib.

Elşən MƏMMƏDOV