Arda “Qalatasaray”dakı taleyinə aydınlıq gətirmədi

Türkiyə milli komandasının futbolçusu Arda Turan “Qalatasaray” klubunda qalıb-qalmayacağı məsələsinə aydınlıq gətirib. Lent.az-ın məlumatına görə, 24 yaşlı yarımmüdafiəçi “Lig TV”yə açıqlamasında iyunun 27-də hazırkı komanda yoldaşları ilə bir araya gələcəyini bildirib.

Həmin vaxtadək Arda dincələcəyini söyləyib. İspaniya “Atletiko”suna keçidi gündəmdə olan oyunçu “Qalatasaray”ın baş məşqçisi Fatih Terimlə aralarında ata-oğul münasibətlərinin olduğunu açıqlayıb: “Ona görə də bu mövzu barədə çox danışmağa gərək yoxdur. Lakin mən Fatih Terimi bir insan kimi çox sevirəm. Onu baş məşqçiliyindən çox insan kimi çox sevirəm. Terim mənim üçün özəl insandır. Peşəkar oyunçuyam, hər şeyi zaman göstərəcək”.

“Yeni mövsümdən nələr gözləyirsən?” sualına cavabında Arda “sarı-qırmızılar”ın heyətində qalacağına işarə vurub. O, hədəflərinin çempionluq olduğunu bildirib.