“Xəzər Lənkəran” Avroliqa hazırlıqlarına legionerlərsiz başlayır

“Xəzər Lənkəran” klubu futbol üzrə Avropa Liqasında II təsnifat mərhələsinin hazırlıqlarına iyunun 15-dən başlayacaq. Klubun icraçı direktoru Höccət Hacıyevin Lent.az-a verdiyi məlumata görə, komanda üzvləri bu gündən etibarən baş məşqçi Mirça Rednikin rəhbərliyi altında Lənkəranda bir araya gələcəklər.

Hazırlıq prosesinə legionerlərdən əlavə, Ruslan Poladov və Tural Cəlilov qatılmayacaq. Hacıyev bildirib ki, Poladovun Bakı “İnter”inə keçəcəyi gözlənilir. Cəlilov isə digər komandalardan birinə icarəyə veriləcək.

“Xəzər Lənkəran” iyunun 20-də Avstriyaya təlim-məşq toplantısına yollanacaq. Legionerlər birbaşa həmin ölkəyə yollanacaqlar. Klubun rəisi Səməd Mustafayev artıq Avstriyada hazırlıq prosesi ilə bağlı məsələlərin həlli ilə məşğuldur. Rəqiblərdən birinin “Panduri” olacağı dəqiqləşib.

Qeyd edək ki, Azərbaycan Kubokunun qalibi olduğundan, “Xəzər Lənkəran” Avropa Liqasının II təsnifat mərhələsindən mübarizəyə qoşulacaq. Komandanın rəqibi iyunun 20-də İsveçrənin Nyon şəhərində atılacaq püşk nəticəsində müəyyənləşəcək. Tədbirə Lənkəran klubundan Höccət Hacıyev və vitse-prezident Tuyqun Nadirov yollanacaq. İlk oyun iyulun 14-də, cavab görüşü isə bundan bir həftə sonra keçiriləcək.