Çeçenistan rəhbərliyindən Qullitə ultimatum

Lent.az-ın məlumatına görə, klubun yaydığı bəyanatda Qullitin ümidləri doğrultmadığı bildirilir.

Rəsmi açıqlamada hollandiyalı mütəxəssisin mövsüm ərzində buraxdığı səhvlər qeyd olunub. Klub rəsmiləri Qullitin hansısa “qaranlıq səbəblərə görə” qışda heyəti gücləndirməyi məqsədəuyğun saymaması və yeni oyunçu almamasının səbəbini anlaya bilməyiblər. Halbuki “Terek”in buna vəsaiti olub.

“Qullitin yarım il ərzində komandanın sükanı arxasındakı fəaliyyəti onun oyunçulardan baş açmadığı və kollektivə özünəməxsus oyun üslubu aşılamadığını göstərir. “Terek” heç vaxt bu qədər ümidsiz görünməyib” - deyə, bəyanatda bildirilir.

O da vurğulanır ki, Kadırov Qullitin qarşısına Rusiya Premyer Liqasının növbəti turunda “Amkar”la səfər matçından 3 xal gətirmək məqsədini qoyub. Əks halda, baş məşqçi qovulacaq. Kadırov Qullitin məhsuldar fəaliyyət əvəzinə bar və diskoteka haqda həddən artıq çox düşünməsindən narahatlığını da ifadə edib.

Qeyd edək ki, Ruud Qullit “Terek”ə yanvarda baş məşqçi təyin olunub. Onunla 2011-2012-ci il mövsümünün sonunadək müqavilə bağlanılıb. Həmin vaxt Qullitin qarşısına Avropa Liqasına vəsiqə verən yerlərdən birini tutmaq məqsədi qoyulub. Lakin 13 turdan sonra Çeçenistan komandası Premyer Liqada 16 klub arasında 14-cü yeri tutur.