Dünya Kubokunda 1 dəst medalla 2-ci yer

Estoniyanın paytaxtı Tallində kişilər arasında cüdo üzrə Dünya Kuboku keçirilib. Lent.az-ın məlumatına görə, turnirdə iştirak edən Azərbaycan yığması bir dəst medal qazanıb.

İlk yarış günündə İlqar Müşkiyev (60 kq) qızıl, Nicat Şıxəlizadə (60 kq) bürünc medala layiq görülüb, Tərlan Kərimov (66 kq) 5-ci yeri tutub. Ertəsi gün isə Ramin Qurbanov (90 kq) gümüş medala sahib çıxıb.

Qurbanov polşalı Viktor Tvorjidlo, ukraynalı Kuedjau Nhebali, estoniyalı Qriqori Minaskin və slovakiyalı Milan Randlı yendikdən sonra finala yüksəlib. Həlledici görüşdə onun qarşısını italiyalı Roberto Meloni kəsib. Sain Məmmədov (100 kq) və Emil Tahirov (+100 kq) ilk, Timur Əlixanov (90 kq) ikinci görüşündə uduzaraq, mübarizəni dayandırıb.

Ümumi hesabda Azərbaycan 2 qızıl, 2 bürünc medal və bir 5-ci yer əldə edən İtaliyadan sonra 2-ci yeri tutub. Dünya Kubokunda 33 ölkə mübarizə aparıb.