London olimpiadasının məşəli təqdim olundu – FOTO

Lent.az-ın məlumatına görə, məşəl qızıl suyuna salınmış, piramida formalı, 3 künclü və çoxsaylı deşikli olacaq. Məqsəd Britaniya şəhərlərində olimpiya məşəli estafetini qarşılayacaq hər kəsin onu görməsindən ibarətdir. Məşəlin alüminiumdan hazırlanması onun ən kiçik estafet iştirakçıları üçün yüngül olmasını şərtləndirəcək. Məşəlin çəkisinin azaldılması üçün səthində 8000 deşik açılıb. Bu, həm də estafet iştirakçılarının sayını və məşəlin Britaniya ərazisindən keçəcəyi hissənin uzunluğunu göstərir. Məşəlin 3 küncə malik olması isə Londonun 1908 və 1948-ci illərdən sonra üçüncü dəfə Yay Olimpiya Oyunlarını qəbul edəcəyini göstərir.

İngiltərənin Koventri qraflığında 8 min məşəl hazırlanacaq. Prototipin sınağı yaxın vaxtlarda Almaniyanın Münhen şəhərində “BMW” avtokonserninin mütəxəssisləri tərəfindən aparılacaq. Məşəl aşağı və yüksək temperaturla küləyə duruş gətirə biləcək. O, Yunanıstandan İngiltərəyə 2012-ci il mayın 18-də çatdırılacaq. Ardından məşəl bütün ölkəni dolaşdıqdan sonra iyunun 27-də London olimpiya stadionuna çatacaq. 74 gün ərzində estafet ölkənin 74 yaşayış məntəqəsindən keçəcək.