Aleksandr Çertoqanov rəsmən “Qəbələ”də!

Bu haqda Lent.az-a 31 yaşlı yarımmüdafiəçinin özü məlumat verib.

Çertoqanovun sözlərinə görə, az öncə imnzalanan müqavilə 2 il müddətinə nəzərdə tutulub. Yığmamızın yarımmüdafiəçisi “İnter”dən dostcasına ayrıldığını söyləyib: “Bu komandada çıxış etdiyim iki il ərzində karyeram uğurlu alındı. Azərbaycan çempionluğunu və “Birlik Kuboku”nu qazandım. Bundan sonra “Qəbələ”dən təklif aldım və özümü bölgə komandasında sınamaq istədim. “İnter” rəhbərliyinə mənə daim dəstək olduqları üçün minnətdarlıq edib “Qəbələ” ilə müqavilə bağladım. Yeni klubumda da futbolçuların məşq və məişət şəraiti yüksək səviyyədədir. Qəbələdə gözəl meydançalar salınıb, komandanın qarşısına yüksək hədəflər qoyulub. Mən də iddialı klubda çıxış etmək və Azərbaycan millisinə fayda vermək istədiyimdən, təklifi məmnuniyyətlə qəbul etdim. Nəticədə klubla 2 illik rəsmi müqavilə bağladım”.

Qeyd edək ki, “Qəbələ” 2004-cü ildən ölkəmizdə çıxış edən ukraynalı oyunçunun karyerasında ilk region komandası olacaq. Təcrübəli futbolçu daha öncə “Bakı” və “Neftçi”də də çıxış edib.

Elşən MƏMMƏDOV