Unibank Premyer Liqası: Jaba “Bakı”nı sadəcə, biabırçılıqdan qurtardı
09 avqust 2010 11:15 (UTC +04:00)

Unibank Premyer Liqası: Jaba “Bakı”nı sadəcə, biabırçılıqdan qurtardı

Futbol üzrə Unibank Premyer Liqası start götürüb.



Lent.az-ın məlumatına görə, Azərbaycan çempionatının I turunda ən gözlənilməz nəticə “Bakı”nın ötən mövsüm “Olimpik-Şüvəlan” adı altında çıxış etmiş AZAL-a məğlubiyyəti olub.

Avropa Liqasının II təsnifat mərhələsində qeyri-peşəkar addımın güdazına gedən almaniyalı baş məşqçi Vinfrid Şeferin komandasını böyük hesablı məğlubiyyətdən Jaba xilas edib. Braziliyalı hücumçu “dubl” edərək, “Bakı”nın biabırçı hesabla uduzmasına imkan verməyib – 2:3. Yeri gəlmişkən, ilk turun 3 “dubl”undan 2-si məhz bu oyuna təsadüf edib.


Avropa Liqasında “pley-off” mərhələsinə yüksələn “Qarabağ” qarşısına çempionluq və ölkə kubokunu qazanmaq məqsədini qoyan “Neftçi” üzərində qələbəni son dəqiqələrdə əldən verib – 1:1. Flaqmanın qolunu özbəkistanlı yeni transfer Bahodir Nasimov vurub. Mövsümün supertransferi Emil Mpenza gözlənilən oyunu sərgiləyə bilməyib və 55-ci dəqiqədə gənc futbolçu Cavid İmamverdiyevlə əvəzlənib.


Eyni hesablı nəticə 4 ildən sonra güclülər sırasına qoşulan “Gəncə” ilə bu mövsümdən yerli futbolçularla oynamağa üstünlük verən “Simurq” arasındakı qarşılaşmada qeydə alınıb. Unibank Premyer Liqasının daha bir debütantı MOİK isə “Muğan” üzərində əzmkar qələbə qazanıb – 3:2. İkiqat Azərbaycan çempionu “İnter” Tovuzda “Turan”ı böyük hesabla yenib – 3:0. Yeni mövsümə əcnəbi baş məşqçilər Mirça Rednik və Toni Adamsla başlayan “Xəzər Lənkəran”la “Qəbələ”nin “duel”inin taleyini bir dəqiq zərbə həll edib. Bu qolu Lənkəran komandasının albaniyalı müdafiəçisi Elvin Begiri vurub.


Ümumiyyətlə, ilk turun 6 qarşılaşmasında qapılara 18 qol vurulub ki, bu da hər oyuna 3 qol deməkdir. Mövsümün ən erkən qoluna “İnter”in hücumçusu Robertas Poşkus imza atıb. Qapılara cəmi 1 penalti təyin edilib. Lakin “Muğan”ın oyunçusu Elnur Abdullayevin vurduğu zərbəni MOİK-in qapıçısı Amiran Qventadze dəf etməyi bacarıb.

7 avqust

“Gəncə” – “Simurq” (Zaqatala) – 1:1
Sabir Allahquliyev, 82 – Baçana Tsxadadze, 71

“Bakı” – AZAL – 2:3
Jaba, 64; 77 - Qvidas Yuşka, 43; 52. Mirko Bunyevçeviç, 54

“Xəzər Lənkəran” – “Qəbələ” – 1:0
Elvin Begiri, 75

“Turan” (Tovuz) – “İnter” (Bakı) – 0:3
Robertas Poşkus, 3. Mario Souza, 7. Dmitri Kruqlov, 17

MOİK (Bakı) – “Muğan” (Salyan) – 3:2
Nuran Qurbanov, 34. Anar Qasımov, 68; 83 – Əkrəm Hodziç, 62. Dan Pisla, 64

“Neftçi” – “Qarabağ” – 1:1
Bahodir Nasimov, 88 – Rəşad Sadiqov, 80.
1 2 3 4 5 İDMAN XƏBƏRLƏRİ
# 535

Oxşar yazılar