Arif Əsədov: ““Neftçi” doğru yoldadır, amma çatışmazlıqları da var” - MÜSAHİBƏ

Avstriyada təlim-məşq toplantısında olan “Neftçi” futbol komandasının baş məşqçisi Arif Əsədov klubun rəsmi saytına müsahibə verib.

Lent.az-ın məlumatına görə, gənc mütəxəssis hazırlıq prosesi və yoxlama matçları haqda danışıb:

- İyulun 1-dən Avstriyada toplanışda olan “ⅦNeftçi” “Beşiktaş” kimi güclü rəqiblə bərabər səviyyədə mübarizə apararaq heç-heçə etdi. Bu oyun “Neftçi”yə nə verdi?

- Başda prezident Sadıq Sadıqov olmaqla klub rəhbərliyi tərəfindən bizim qarşımıza qoyulan əsas vəzifə “Neftçi”nin baxımlı oyununu qaytarmaqdır. Məşqçi heyəti olaraq məhz bunun üzərində çalışırıq. "Beşiktaş"la görüş göstərdi ki, biz doğru yoldayıq. Təbii ki, bir çox çatışmazlıqlar mövcuddur, Avstriyadakı toplanışa yeni başladığımızı nəzərə alsaq, bu başadüşüləndir. Türk komandası ilə oyunda heyətimizdə olan təcrübəli və gənc futbolçular adlı-sanlı rəqibə qarşı çəkinmədən səylə mübarizə apardılar. Onlara verdiyimiz tapşırığı yerinə yetirdilər.

- Avstriya bir çox komandaların təlim-məşq üçün seçdiyi məkandır. Ümumiyyətlə, hazırlığın gedişi, stadionların vəziyyəti sizi qane edir?
- Avstriyada Avropanın tanınmış klubları toplanış keçir. Yığma komandamız da hazırlığını bu ölkədə davam etdirirdi. Məhz həmin vaxt yığmanın oyununu izləməyə gələrkən, buradakı ideal şəraitlə tanışlıq imkanımız oldu. Klub rəhbərliyi tərəfindən komandanın yüksək səviyyədə hazırlıq keçməsi üçün ideal şərait yaradılıb. Bu təlim-məşq toplanışında biz güclü klublarla hazırlıq görüşləri oynamağa üstünlük veririk. Məşq etdiyimiz stadionun vəziyyəti isə əladır.

- Növbəti oyunda “Neftçi” daha bir güclü komanda olan Rumıniya təmsilçisi “Otselul”la qarşılaşacaq. Bu oyunda biz gənc futbolçuları “Beşiktaş”la görüşdə olduğu kimi meydanda görə biləcəyikmi?

- “Neftçi”nin heyətində hər zaman perspektivli gənc futbolçular yetişib. Ötən mövsümün son turlarında əsas heyətdə gənclərə yer verərək həyata keçirdiyimiz siyasəti davam etdiririk. Növbəti oyunda da belə olacaq, komandamızın gələcəyi gənclərdir. Sərt futbola üstünlük verən rumın komandasını seçməkdə məqsəd belə rəqiblərlə görüşdə də futbolçularımızın nəyə qadir olduğunu yoxlamaqdır.