XİN-dən Elmar Məmmədyarovla Edvard Nalbandyanın görüşünə dair açıqlama

İyulun 12-də Vyanada Azərbaycanın xarici işlər naziri Elmar Məmmədyarovun ATƏT-in Minsk Qrupu həmsədrləri ilə görüşü keçirilib.

Sonra Ermənistanın xarici işlər naziri Edvard Nalbandyanın iştirakı ilə həmsədrlərlə daha bir görüş olub. Azərbaycan XİN-in mətbuat xidmətinin rəhbəri Elman Abdullayev APA-ya bildirib ki, görüşdə Dağlıq Qarabağ münaqişəsinin sülh yolu ilə həlli müzakirə olunub: “Azərbaycanın prinsipial mövqeyi xarici işlər naziri tərəfindən həmsədrlərlə ayrılıqda və Edvard Nalbandyanın iştirakı ilə keçirilən görüşlərdə ifadə edilib. Bu mövqe ondan ibarətdir ki, sülh prosesinin “ölü nöqtə”dən tərpənməsi üçün Ermənistan Silahlı Qüvvələri Azərbaycanın işğal olunmuş ərazilərini tərk etməlidir”.

E. Abdullayevin sözlərinə görə, nazir E. Məmmədyarov mövcud status-kvonun qəbuledilməz olduğunu bir daha bəyan edib.