Dondurucuda saxlanılan çörəyi yenidən yumşaq və xırtıldayan hala gətirmək mümkündür. Mütəxəssislər bunun üçün bir neçə sadə üsul açıqlayıblar.
Lent.az xarici mediaya istinadən xəbər verir ki, çörəyi dondurmaq onun xarab olmasının qarşısını almağın və qida israfını azaltmağın ən asan yollarından biridir. Mütəxəssislərin sözlərinə görə, çörək bir neçə gün ərzində yeyilməyəcəksə, onu təzə halda dondurucuya yerləşdirmək daha məqsədəuyğundur. Düzgün qablaşdırılan çörək dondurulduqda dadını və quruluşunu böyük ölçüdə qoruyub saxlayır.
Dondurulmuş çörəyi necə yumşaltmaq olar?
Mütəxəssislər bildirirlər ki, çörəyi əritməyin ən sadə yolu onu otaq temperaturunda saxlamaqdır. Adətən bir dilim çörəyin tam əriməsi üçün təxminən 20 dəqiqə kifayət edir. Bundan başqa, dondurulmuş çörəyi birbaşa tosterə yerləşdirmək də mümkündür.
Müasir tosterlərin əksəriyyətində qar dənəciyi işarəsi ilə göstərilən xüsusi “defrost” (əritmə) funksiyası mövcuddur. Bu rejimdə cihaz daha uzun müddət və ya nisbətən aşağı temperaturda işləyir. Nəticədə çörək əvvəlcə əriyir, daha sonra qızarır və içərisi soyuq qalmır.
Çörəyin qabığını yenidən xırtıldayan etmək üçün nə etməli?
Mütəxəssislərin sözlərinə görə, iri çörək parçaları və bagetlər daha gec əriyir. Buna görə də çörəyi dondurmazdan əvvəl dilimləmək və kiçik porsiyalara bölmək tövsiyə olunur. Çörəyin təzə bişmiş kimi olması üçün isə başqa bir üsul da var.
Əridilən çörəyi bir neçə dəqiqə sobada qızdırmaq kifayətdir. Bu zaman onun qabığı yenidən xırtıldayan, içərisi isə yumşaq olur. Ekspertlər vurğulayırlar ki, çörəyi düzgün dondurmaq həm məhsulun dadını qoruyur, həm də ailə büdcəsinə qənaət etməyə kömək edir.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
