Şirkətdən 60 000 dolları aparanların şikayəti təmin edilmədi

Bakı Apellyasiya Məhkəməsində şirkətdən quldurluqda təqsirləndirilən Azad Həziyev, Nicat Xəlilov və Aqşin Mustafayevin birinci instansiya məhkəməsinin hökmündən verdikləri şikayət üzrə məhkəmə prosesi yekunlaşıb.

Lent.az-ın məlumatına görə, keçirilən prosesdə qərar oxunub. Hakimlər kollegiyasının qərarına əsasən şikayət təmin edilməyib.

Qeyd edək ki, ötən ilin avqustda "Qara çay" tikinti şirkətinin gözətçisi Zina Bəşirovanın əl-qolunu bağlayaraq, içərisində 60 000 ABŞ dolları və şirkətə məxsus sənədlər olan seyfi quldurluq yolu ilə talayıblar. Polis əməkdaşların əməliyyat axtarış tədbirləri nəticəsində A. Mustafayev, N. Xəlilov, A. Həziyev saxlanılıb. Onlara Cinayət Məcəlləsinin 181(quldurluq) maddəsi ilə ittiham verilib. Bakı Ağır Cinayətlər Məhkəməsinin hökmü ilə A. Həziyev 14 il 6 ay, A. Mustafayev və N. Xəlilov 14 il müddətinə azadlıqdan məhrum edilib. Hökmdən narazı qalan təqsirləndirilən şəxslər apellyasiya şikayəti veriblər.