Sınaq imtahanına hazırlaşanlara xəbər

Tələbə Qəbulu üzrə Dövlət Komissiyası rezidenturaya hazırlaşan namizədlərə kömək məqsədilə avqustun 17-də baza fənləri, 18-də isə ixtisas fənləri üzrə sınaq imtahanları keçirəcək. Bu barədə Lent. az-a Komissiyanın mətbuat xidmətindən məlumat verilib. İmtahanda iştirak etmək istəyən namizədlər avqustun 6-dan 15-dək internet vasitəsilə qeydiyyatdan keçməlidirlər.

Sınaq imtahanları Bakı şəhərində keçiriləcək. Sınaq imtahanına gələrkən namizədlər şəxsiyyət vəsiqəsi və imtahana buraxılış vərəqəsini özləri ilə gətirməlidirlər. Başqasının şəxsiyyət vəsiqəsi ilə yazılmış namizədlər imtahan binasına buraxılmayacaqlar.

Qeydiyyatdan keçmək üçün 2 ədəd TQDK-nın virtual ödəmə kartı tələb olunur. Ödəmə kartlarını elektron xidmətlər portalında göstərilən internet ünvanlarından əldə etmək olar. Sınaq imtahanına yazılmaq üçün nəzərdə tutulan virtual ödəmə kartlarını SMS-lə əldə etmək istəyən namizədlər “Azercell”, “Baksell” və “Nar Mobile” nömrələrindən 7735 nömrəsinə SMS göndərməlidirlər. SMS-ə cavab olaraq abonentin telefonuna kartın seriya nömrəsi və Pin kodu göstərilən virtual ödəmə kartı daxil olacaq.