Saatlıda zəhərlənənlərin vəziyyəti stabildir

Saatlı rayonunda evdə konservləşdirilmiş pomidor turşusundan zəhərlənən şəxslərin vəziyyəti stabildir.

Bunu APA-ya açıqlamasında 1 saylı Şəhər Klinik Xəstəxanasının İnfeksion-Reanimasiya şöbəsinin məsul həkimi Vaqif Baloğlanov deyib.

Xəstəxanaya Saatlıdan zəhərlənmə diaqnozu ilə 5 nəfərin müraciət etdiyini deyən V.Baloğlanov onlardan ikisinin azyaşlı olduğu üçün 2 saylı Uşaq Xəstəxanasına köçürüldüyünü deyib: “Hazırda burada olan 3 xəstə reanimasiya şöbəsindən çıxarılıblar, müstəqil nəfəs alırlar”.

Ə.F.Qarayev adına 2 saylı uşaq kliniki xəstəxanasından isə bildiriblər ki, azyaşlıların vəziyyəti orta-ağır olaraq qalır: “Daha çox Fəqan Məmmədovun vəziyyəti pisdir. Uşaqlar hələ də reanimasiya şöbəsindədirlər”.

Qeyd edək ki, kütləvi zəhərlənmə Saatlı rayonunun Şirinbəy kəndində hadisəsi baş verib. Evdə konservləşdirilmiş pomidor turşusundan bir ailənin 6 üzvü zəhərlənib. Kənd sakini, 1932-ci il təvəllüdlü Məmmədov Ənvər Savalan oğlu xəstəxanaya aparılarkən yolda dünyasını dəyişib. Onun həyat yoldaşı 1937-ci il təvəllüdlü Məmmədova Sona Kərəm qızı, 1984-cü il təvəllüdlü oğlu Məmmədov Sahib Ənvər oğlu, 2006-cı il təvəllüdlü Məmmədov Aqşin Sahib oğlu, 2008-ci il təvəllüdlü Məmmədov Fəqan Sahib oğlu, 1934-cü il təvəllüdlü Səfərova Dilbər Kərəm qızı zəhərlənmə diaqnozu ilə xəstəxanaya çatdırılıblar.