Oqtay Gülalıyevin oğlu bıçaqlanıb

Sentyabrın 23-də axşam saatlarında ictimai fəal Oqtay Gülalıyevin oğlu Əli Gülalıyevə hücum edilib. Lent.az-ın Turan-a istinadən verdiyi məlumata görə, 4-5 nəfər gənc 16 yaşlı Əlini döyüb və iki bıçaq xəsarəti yetiriblər. Gəncin vəziyyəti orta-ağır kimi səciyyələndirilir.

Xətai rayon Polis İdarəsi, 37-ci Polis Bölməsindən Lent.az-a bildirilib ki, O.Gülalıyev oğlunun döyülməsi və bıçaqlanması ilə bağlı polisə müraciət edib. Polisdən verilən məlumata görə, hazırda müraciətlə bağlı araşdırmalar aparılır.

Qeyd edək ki, hadisə saat 22 radələrində Gülalıyevlərin yaşadığı NZS qəsəbəsində baş verib. Əli Gülalıyev sinif yoldaşından dərsliyi almaq üçün evdən çıxıb. Qayıdarkən evlərindən təxminən 100 metr məsafədə 4-5 gənc ona hücum edib, döyməyə başlayıb, sol əlinə və sol buduna iki bıçaq xəsarəti yetiriblər. Çox qan itirən gənci təsadüfən yoldan keçənlər evə gətiriblər. Yaralarının dərinliyi 12 sm təşkil edib.