Füzulidəki qəza ilə bağlı RƏSMİ AÇIQLAMA - YENİLƏNİB

Daxili İşlər Nazirliyi Füzuli rayonunun Horadiz şəhərində baş vermiş yol-nəqliyyat hadisəsi ilə bağlı məlumat yayıb. Lent.az nazirliyin saytına istinadən xəbər verir ki, aprelin 17-də saat 07 radələrində Füzuli rayonunun Horadiz şəhərində yerləşən yanacaqdoldurma məntəqəsində rayon sakini Cahid İsfəndiyarlı idarə etdiyi “Mitsubishi” markalı avtomobillə orada işləyən Beyləqan rayon sakini Hikmət Məmmədzadəni vurub. Daha sonra C.İsfəndiyarlı idarəetməni itirdiyindən avtomobili həmkəndlisi Niyaməddin Babayevə məxsus “Mercedes” markalı avtomobilə çırpıb. Nəticədə H.Məmmədzadə hadisə yerində ölüb, C.İsfəndiyarlı isə xəstəxanaya yerləşdirilib.

Füzuli RPŞ tərəfindən araşdırma aparılır.

******

17 aprel

Füzuli rayonunda ölümlə nəticələnən yol qəzası baş verib. Lent.az-ın məlumatına görə, rayon ərazisindəki yanacaqdoldurma məntəqəsinə daxil olmaq istəyən "Mitsubishi Pajero" markalı, 90 FK 761 dövlət qeydiyyat nişanlı avtomobil həmin məntəqənin işçisini vurub. Beyləqan rayonunun Maşqara kəndinin sakini olan 25 yaşlı Məmmədov Hikmət Yusif oğlu aldığı xəsarətlərdən vəfat edib.

İlkin araşdırma nəticəsində məlum olub ki, yanacaqdoldurma məntəqəsinin işçisi obyektən bir qədər kənara çəkilərək siqaret çəkirmiş. Bu zaman benzin doldurmaq üçün yaxınlaşan avtomobilin sürücüsü onu görməyib və piyadanı vurub.

Faktla bağlı araşdırma aparılır.