Yoxa çıxan Təranə ilə bağlı yeni faktlar - POLİSLƏR MEŞƏDƏ TAPIBLAR - YENİLƏNİB

Lənkəranda bacısının qətlində şübhəli bilinərək tutulan, əməli sübuta yetirilmədiyi üçün sonradan sərbəst buraxılan Fuad Ağayev yenidən Xoşqədəm Hidayətqızının verilişinə çıxıb. Lent.az xəbər verir ki, tutulmamışdan əvvəl də telekanala müraciət edən F.Ağayev bacısı Nazəndə ilə birgə verilişə gəlib. Burada məlum olub ki, 2012-ci ildə Təranə Ağayeva itkin düşməzdən 2 ay əvvəl evdən qaçıbmış. Daha sonra isə o, birlikdə qaçdığı oğlanın onu yarı yolda atması səbəbindən evə qaytarılıb. Polislər gecə saatlarında gənc qızı meşəlikdən tapıb bölməyə gətiriblər və daha sonra o, ailəsinə təhvil verilib. Hadisədən bir müddət sonra isə T.Ağayeva yoxa çıxıb.

F.Ağayev bildirib ki, bacısı qeyri-sağlam həyat tərzi sürən şəxslərlə münasibətdə olub və onlar Təranəni yoldan çıxarıb.

Hazırda T.Ağayevanın ölüsündən ya dirisindən xəbər yoxdur.

*****

12:10

Lənkəran rayonunun Nərimanabad qəsəbəsində 24 yaşlı Təranə Ağayevanın 2012-ci ildə itkin düşməsi ilə bağlı araşdırmalar davam etdirilir.

Gənc qızın qardaşı tərəfindən öldürüldüyü bildirilsə də, bu iddia təsdiqini tapmayıb və polis tərəfindən saxlanılmış Fuad Ağayev sərbəst buraxılıb.

Uşaqların atası Polad Ağayev isə Lent.a-a açıqlamasında Təranənin qətlə yetirilmədiyini, evdən qaçdığını deyib. Oğlunun yanlış məlumat əsasında tutulduğunu və sonradan sərbəst buraxıldığını bildirən ata qızının ölüsünü, ya dirisini tələb edib: "Uşaq bacısını öldürdüyünü yalandan boynuna götürməli olub. Əslində qız ölməyib. Qaçmazdan bir gün əvvəl anasına sahəyə gedəcəyini deyib və həmin vaxtdan yoxa çıxıb. Həmin vaxt Fuad Bakıda olub. Sonra qardaşına zəng edib deyib ki, qaçır. Amma kiminlə getdiyini deməyib. Hələ də dəqiq bilmirik ki, hardadı, kim aparıb, ölüdü, ya sağdı. Qızın dərdindən yoldaşımı infarkt vurdu, rəhmətə getdi".

*****

11:12

Lənkəranda 4 il əvvəl itkin düşən bacısını öldürməkdə təqsirləndirilən şəxs həbsdən buraxılıb.

Hüquq-mühafizə orqanlarından APA-ya verilən məlumata görə, 2012-ci ildə itkin düşən 1988-ci il təvəllüdlü Təranə Polad qızı Ağayevanın meyitinin tapılması istiqamətində əməliyyat-axtarış və istintaq tədbirləri davam etdirilir. Qızın öldürülməsində şübhəli bilinərək saxlanılan qardaşı Fuad Ağayev isə meyit tapılanadək ölkəni tərk etməmək şərti ilə sərbəst buraxılıb. O, bu müddət ərzində polis nəzarətində olacaq.

Daxili İşlər Nazirliyinin mətbuat xidmətindən APA-ya faktı təsdiqləyiblər.

Qeyd edək ki, 2012-ci ildə Lənkəranın Nərimanabad qəsəbə sakini, 1988-ci il təvəllüdlü Təranə Polad qızı Ağayevanın itkin düşməsi barədə axtarış elan olunub. Həyata keçirilən istintaq hərəkətlərindən sonra axtarılan şəxsin qardaşı, 28 yaşlı Fuad Ağayev şübhəli şəxs qismində saxlanılıb. İstintaqa verdiyi ifadəsində F.Ağayev ailə münaqişəsi zəminində bacısını daşla döyərək öldürdüyünü və meyitini qəsəbə ərazisində yaşayış olmayan yerdə basdırdığını boynuna alıb.

Lakin cinayəti törətmiş şəxsin göstərdiyi yerdən T. Ağayevanın meyiti aşkarlanmayıb.

F. Ağayev daha sonra ifadəsində meyitin qalıqlarını dənizə atdığını deyib.

Hazırda istintaq tədbirləri davam etdirilir.