Krasnoyarskda həmyerlisini güllələyən azərbaycanlıya hökm oxundu

Krasnoyarsk vilayət məhkəməsində "Anastasiya" kafesində öz həmyerlisini güllələyən azərbaycanlı Zaur Məmmədova hökm oxunub. O, 9 il müddətinə azadlıqdan məhrum edilib.

APA TV-nin xəbərinə görə, hadisə bu il aprelin 13-də Oktyabrsk küçəsində yerləşən "Anastasiya" kafesində baş verib. 25 yaşlı Zaur Məmmədov kafedə "Makarov" tipli tapança ilə 2 metr uzaqlıqdan Nağıyev familiyalı 37 yaşlı tanışına 4 dəfə atəş açıb. Zərərçəkmiş yıxıldıqdan sonra o, daha iki atəş açaraq qaçmağa çalışıb. Lakin kafenin müştərilərindən olan polis əməkdaşı onu tuta bilib. Məmmədov silahını ona təslim edib.

Vilayət məhkəməsi cinayətin motivlərini açıqlayıb. 1999-cu ildə Krasnoyarskın Sovetski rayonunda müttəhimin atası, 2009-cu ildə əmisi öldürülüb. 2011 və 2013-cü illərdə isə Zaur Məmmədov naməlum şəxslər tərəfindən atəşə məruz qalıb və çoxsaylı güllə yarası alıb. Bu cinayətlərin törədilməsində Zaur Məmmədov eyni zamanda onun nəqliyyat biznesinə də mane olan Nağıyev soyadlı şəxsi günahkar bilib. 2014-cü ilin aprelində o, Nağıyevin adamları tərəfindən izlənildiyindən şübhələnib.

Başlanan cinayət işinə əsasən, Məmmədovun ömürlük azadlıqdan məhrum edilməsi gözlənilirdi. Lakin məhkəmə cinayətin motivlərini, onun öz cinayətini boynuna almasını və himayəsində 3 azyaşlının olmasını nəzərə alaraq, cəzasını ciddi rejimli cəzaçəkmə müəssisəsində çəkməklə 9 il azadlıqdan məhrum edib.