Jurnalist Anar Niftəliyev və qayınatası prokurorluqda dindirilib
26 sentyabr 2013 10:47 (UTC +04:00)

Jurnalist Anar Niftəliyev və qayınatası prokurorluqda dindirilib

Tənqidçi Elnarə Tofiqqızını əməliyyata hazırlayan həkim heyəti və "Medi Sina" klinikasının baş həkiminin izahatlarından sonra dünən onun həyat yoldaşı, jurnalist Anar Mahmudoğlu (Niftəliyev) və onun qayınatası Tofiq İmamquliyev də Nəsimi rayon prokurorluğunda dindirilib. Lent.az-ın məlumatına görə, bununla bağlı A.Mahmudoğlu aznews.az-a bildirib. Jurnalist qeyd edib ki, müayinələr, əməliyyatın niyə Medi Sinada aparılmasından tutmuş, ölüm anına qədər bütün məsələlər barədə ətraflı məlumat verilib: "İzahatı prokuror köməkçisi İsmayıl Rövşənov alırdı. Ondan cinayət işinin açılıb-açılmaması ilə bağlı soruşdum. İ.Rövşənov hələlik, cinayət işinin açılmadığını və ekspertlərin yekun rəyini gözlədiklərini bildirdi".

Qarşı tərəfin araşdırmanın gedişinə mane olmaq üçün hansısa addımlar atıb-atmaması ilə bağlı suala isə A.Mahmudoğlu artıq müəyyən cəhdləri hiss etdiyini söylədi: "Doğrudur, Nəsimi rayon prokurorluğunda izahat verərkən heç bir ciddi narahatlıq hiss etməsəm də, həkimlərin məsuliyyətdən yaxa qurtarmaq üçün bəzi cəhdlər etməsi ilə bağlı artıq məlumatlıyam. Bununla bağlı gələn həftə Azərbaycan Prezidentinə, Səhiyyə nazirinə və Baş prokurora müraciət edəcəyəm. İstəyirəm ki, bu araşdırma şəxsən Prezidentin nəzarəti altında və tam ədalətlə aparılsın. Çünki bu, təkcə mənim faciəm deyil, səhiyyəmizin faciəsidir və günahkar cəzalanmasa, belə faciələr hamının qapısını döyə bilər".

 

# 749
avatar

Oxşar yazılar