Hövsanda 5 yaşlı uşaq dərmandan zəhərlənib öldü

Bakının Hövsan qəsəbəsində azyaşlı uşaq naməlum şəraitdə ölüb. APA TV-nin xəbərinə görə, qəsəbə sakini olan 5 yaşlı Ömər Fətəliyevin qəbul etdiyi dərman preparatının təsiri nəticəsində vəfat etdiyi bildirilir.

Bəzi iddialara görə isə, hadisə qəsəbədə yerləşən 270 saylı uşaq bağçasında baş verib. Hadisənin təfərrüatlarını öyrənmək üçün azyaşlının tərbiyə aldığı bağçanın müdirəsi Səidə İmanova ilə əlaqə saxladıq.

S.İmanova hadisənin rəhbərlik etdiyi bağçada baş verməsi ilə bağlı deyilənləri təkzib etdi: "Hadisə xəstəxanada baş verib. Sadəcə, biz bu gün gedib, başsağlığı vermişik. Bağçaya aid bir şey deyil. O, evdə idi, ondan sonra da aparıblar onu xəstəxanaya. Biz eşitdiyimizə görə, bu dərmana görədir. "Nurofen" veriblər, belə bir dərman veriblər. Biz indi yasda idik, orada belə danışırlar".

Faktla bağlı Suraxanı rayon Polis İdarəsinin 30-cu Polis Bölməsi ilə əlaqə saxladıq. Bölmə rəisinin köməkçisi Əli Seyidov APA TV-yə açıqlamasında hadisədən xəbərsiz olduqlarını deyərək, faktın araşdırılacağını bildirdi.