FHN 4 nəfərin öldüyü qəza ilə bağlı məlumat yaydı - YENİLƏNİB

Bakı-Qazax yolunda baş verən ağır qəzada dünyasını dəyişən 4 nəfərdən ikisinin də adı məlum olub.

Onlar 1957-ci il təvəllüdlü Verdiyev Mədət Qəmbər oğlu və 2013-cü il təvəllüdlü Mətiyeva Xanım Səxavət qızıdır.

Sonuncu 2012-ci il təvəllüdlü Mətiyeva Fəridə Səxavət qızı və xəstəxanada dünyasını dəyişən 2014-cü il təvəllüdlü Mətiyev İbrahim Səxavət oğlunun bacısıdır. Beləliklə, qəzada bir ailənin üç azyaşlı övladı həyatını itirib.

***

18.06

Fövqəladə Hallar Nazirliyi (FHN) Bakı-Qazax yolunun 281-ci kilometrliyində, Ağdaş rayonu ərazisində baş vermiş dəhşətli qəza ilə bağlı məlumat yayıb. Lent.az-ın nazirliyin saytına istinadən verdiyi xəbərə görə, dərhal hadisə yerinə gələn FHN-nin müvafiq xilasetmə qüvvələri cəlb olunub. “Ford” markalı avtomobilin 7 nəfər sərnişini yaralı vəziyyətdə, 2 nəfər kimliyi məlum olmayan şəxs və 2012-ci il təvəllüdlü Fəridə Səxavət qızı Mehtiyevanın cəsədləri xilasedicilər çatana qədər xəstəxanaya aparılıb. Avtomobilin sürücüsü yaralı vəziyyətdə və 1 nəfər kimliyi məlum olmayan şəxsin cəsədi deformasiyaya uğramış avtomobildə sıxılmış vəziyyətdə qalıb.

Xilasedicilər təhlükəsizlik qaydalarına riayət etməklə xüsusi alət və avadanlıqlar vasitəsilə yaralını və kimliyi məlum olmayan şəxsin cəsədini avtomobildən çıxarıb və hadisə yerinə çağırılmış Təcili Tibbi Yardım Stansiyasının əməkdaşlarına təhvil veriblər.

Hadisə ilə əlaqədar müvafiq qurumlar tərəfindən təhqiqat aparılır.