FHN-in təyyarəsi Türkmənistandadır

Bu gün Fövqəladə Hallar Nazirliyinin xüsusi təyyarəsi Xəzər dənizinin sahillərindən 55 km uzaqlıqda tapılan neftçi Qasımov Mübariz Dilqəm oğlunun meyitini Bakıya gətirmək Türkmənistana yola düşüb. Lent.az-ın məlumatına görə, istintaq qrupu və bəzi neftçiləri aparan təyyarə artıq Türkmənistandadır və yaxın saatlarda Bakıya qayıdacaq. Neftçinin meyiti Azərbaycana gətirildikdən sonra Səhiyyə Nazirliyinin Məhkəmə-Tibbi Ekspertiza və Patoloji Anatomiya Birliyinə aparılacaq, sonra isə ailəsinə təhvil veriləcək.

Neftçi Mübariz Qasımov sabah Tovuz rayonunda dəfn olunacaq.

Qeyd edək ki, dünən Xəzər dənizinin Türkmənistan sahillərindən 55 km uzaqlıqda Azərbaycana məxsus "Cabbar Həşimov" gəmisi kişi cəsədi aşkar edib. Dərhal yaxınlıqda olan Türkmənistana məxsus "Caspian Rovşan" gəmisinə məlumat ötürülüb və cəsəd gəminin göyərtəsinə qaldırılaraq Türkmənbaşı dəniz limanı istiqamətində aparılıb.

Məlum olub ki, meyit “Günəşli” yatağındakı 10 saylı dərin dəniz özülündə mexanik işləyən və baş vermiş qəza nəticəsində itkin düşən neftçi, 1958-ci il təvəllüdlü Qasımov Mübariz Dilqəm oğluna məxsusdur.

Xatırladaq ki, dekabrın 4-də güclü tufan nəticəsində "Günəşli" yatağındakı 10 saylı dərin dəniz özülündə yüksək atmosfer təzyiqi ilə işləyən sualtı qaz xəttinin dayaq borusu qırılıb, boru kəməri zədələnib və yanğın baş verib. Xilasetmə əməliyyatı nəticəsində 33 nəfər xilas edilib. 10 nəfər neftçinin cəsədi ailəsinə təhvil verilib. "Neft daşları"ında baş verən qəzada itkin düşən 3 neftçi də daxil olmaqla, 22 nəfərin axtarışı davam etdirilir.