[b]"Səbaildə 240 kv/m ərazi yanıb" -[/b] FHN - YENİLƏNİB

“Səbail rayonunda baş verən yanğın istifadə olunmayan və hazırda təmir işləri aparılan 5 mərtəbəli binanın 2-ci mərtəbəsində baş verib. Təxminən 40 dəqiqə ərzində yanğın tam söndürülüb”. APA-nın xəbərinə görə, bunu Fövqəladə Hallar Nazirliyinin (FHN) Dövlət Yanğından Mühafizə Xidmətinin qərargah rəisi Əkbər Novruzov deyib.

Onun sözlərinə görə, binanın mərtəbələr arası örtükləri taxta konstruksiya olduğundan yanğın qısa müddət ərzində geniş əraziyə yayılaraq təxminən 240 kv/m ərazini əhatə edib: “Yanğınsöndürənlərin səyi nəticəsində yanğının binanın digər mərtəbələrinə keçməsinin qarşısı vaxtında alınıb”.

Ə. Novruzov qeyd edib ki, yanğın baş verən əraziyə Nəsimi, Səbail rayon Dövlət Yanğından Mühafizə hissələrinin bölmələri cəlb olunub: “İlk yanğın bölməsi təxminən 3 dəqiqə ərzində hadisə yerinə çatıb. Bizə verilən məlumata görə, yanğın baş verən binada təmir işləri aparıldığından elektrik və qazın verilməsi dayandırılıb”.

Qərargah rəisi onu da qeyd edib ki, hazırda Dövlət Yanğın Nəzarəti Xidməti tərəfindən yanğının baş vermə səbəbləri araşdırılır.

Qeyd edək ki, Bakı şəhəri, Səbail rayonu Neftçilər prospektində yanğın hadisəsi qeydə alınıb. Hadisə yerinə Fövqəladə Hallar Nazirliyinin Dövlət Yanğından Mühafizə Xidmətinin qüvvə və vasitələri cəlb edilib.

***

17:10

Bu gün Bakının mərkəzində, metronun "Sahil" stansiyası yaxınlığıda Səbail rayon Polis İdarəsinin köhnə binasında baş vermiş yanğın söndürülüb. Lent.az-ın məlumatına görə, əraziyə cəlb edilmiş yanğınsöndürmə briqadalarının səyi nəticəsində qapalı yanğının mənbəyi müəyyənləşdirilib və lokallaşdırılmış yanğın tam söndürülüb.

Bildirilir ki, hazırda dörtmərtəbəli binada tüstülənmə az da olsa davam edir və yanğınsöndürənlər divarları sökməklə məşğuldur.

*****

16:38

Fövqəladə Hallar Nazirliyi Bakıdakı yanğınla bağlı məlumat yayıb. Lent.az nazirliyin saytına istinadən xəbər verir ki, ilkin məlumata əsasən, Bakı şəhəri, Səbail rayonu Z.Əliyeva küçəsi 24/52 ünvanında yanğın hadisəsi qeydə alınıb. Mürəkkəb taxta konstruksiyalı binanın 2-ci mərtəbəsinin arakəsmə divarlarında tüstülənmə davam edir, açıq alov müşahidə olunmur. Hadisə yerinə Fövqəladə Hallar Nazirliyinin Dövlət Yanğından Mühafizə Xidmətinin qüvvə və vasitələri cəlb edilib.

*****

15:13

Bu gün günorta saatlarında Bakının mərkəzində yerləşən binalardan birində yanğın başlayıb. Lent.az-ın məlumatına görə, Neftçilər prospekti 129 ünvanında yerləşən 4 mərtəbəli binada güclü yanğın qeydə alınıb. Alovlar ilk olaraq binanın 2-ci mərtəbəsini bürüyüb.

Bildirilir ki, yanan binada 2010-cu ilədək Səbail rayon Polis İdarəsi yerləşib. Hazırda yanan ərazidə yaşayış yoxdur. Bununla belə ətraf mənzillərdə yaşayan insanlar təxliyə edilib.

Hazırda yanğın nəzarətə alınıb və tezliklə söndürüləcək.