Bakı yaxınlığında 100 nəfər yolda qalıb

Yanvarın 30-u axşam saatlarından etibarən müşahidə edilən kəskin soyuq hava şəraiti ilə bağlı Azərbaycanda bəzi yollarda çətin vəziyyət yaranıb. Baş Dövlət Yol Polisi İdarəsinin İctimaiyyətlə Əlaqələr şöbəsinin rəisi Kamran Əliyevin Lent.az-a verdiyi məlumata görə, axşam saat 22:00-dan gecə saat 3:00-dək Bakı-Şamaxı yolunun 25-ci km-dən 45-ci km-ə qədər çovğun olması ilə əlaqədar Bakıya sərnişin daşıyan və digər şəxsi nəqliyyat vasitələrində 100-dən çox insan qalıb. Həmin şəxslər gecə saatlarında Yol Patrul Xidməti avtomobillərinin köməyi ilə təxliyə olunaraq Bakıya çatdırılıblar. Hazırda ərazidə çovğun dava edir, yolu buz bağlayıb.

K.Əliyev bildirib ki, ərazi üzrə yol istismar idarələrinin iştirakı ilə yollarda xidmət aparılır və bütün ərazilərdə yolun qardan təmizlənməsi prosesi davam edir. Amma qarın güclü yağması səbəbindən qreyderlər yolların təmizlənməsini vaxtında çatdıra bilmirlər: “Qreyderlər 50-60 km məsafədə keçəndən 15 dəqiqə sonra qar yerə oturur, avtomobillər keçən kimi bərkiyir və buzlaşma gedir".