Bacısını öldürməyə cəhddə təqsirləndirilən şəxsin məhkəməsi başlayır

Gəncədə bacısını və onun tanışını öldürməyə cəhddə təqsirləndirilən Ruslan Abbasovun cinayət işi üzrə ibtidai istintaq başa çatıb.

APA-nın məlumatına görə, təqsirləndirilən şəxs barəsində toplanan materiallar baxılması üçün Gəncə Ağır Cinayətlər Məhkəməsinə göndərilib.

Cinayət işi hakim Elmin Rüstəmovun icraatına verilib. Məhkəmənin baxış iclası yaxın günlərdə təyin olunacaq.

Qeyd edək ki, hadisə bu il martın 22-də Gəncədə baş verib. Şəhər sakini 30 yaşlı Amin İsmayılov və 34 yaşlı Gülmira Abbasovanı bıçaqlanıb.

Hər iki şəxs Gəncə şəhər xəstəxanasına çatdırılaraq əməliyyat olunublar. Hüquq-mühafizə orqanlarının apardığı əməliyyat axtarış tədbirləri nəticəsində hadisəni G. Abbasovanın qardaşı Ruslan Abbasovun törətdiyi məlum olub. O, polis tərəfindən saxlanılıb.

Hadisənin qısqanclıq zəminində törədildiyi bildirib.

R.Abbasova Cinayət Məcəlləsinin 29,120.2.4 (xüsusi amansızlıq adam öldürməyə cəhd) və 29, 120.2.7-ci (iki və daha çox şəxsi öldürməyə cəhd) maddələri ittiham verilib.