Azərbaycanda toyda kütləvi zəhərlənmə: 35 nəfər xəstəxanaya düşdü

Fevralın 1-də Mingəçevirdə keçirilən toy məclisində kütləvi zəhərlənmə olub. Lent.az-ın “EL” televiziyasına istinadən verdiyi məlumata görə, toyun başlanmasından bir müddət keçdikdən sonra bəzi qonaqların səhhətində narahatlıq yaranıb. Toydan sonra bu say getdikcə artıb. Bu gün səhər saatlarından etibarən toyda zəhərlənən 35 nəfər Mingəçevir Şəhər Mərkəzi Xəstəxanasına müraciət edib.

İlkin ehtimala görə, zəhərlənməyə salatlar səbəb olub. Toyda istifadə olunan qidalardan şəhər Gigiyena və Epidemiologiya Mərkəzinin əməkdaşları tərəfindən analiz aparılması üçün nümunələr götürülüb.

Qeyd edək ki, məclisdə istifadə olunan salatlar evdə hazırlanıb. Mərkəzi Xəstəxananın qəbul şöbəsinin həkimləri tərəfindən müraciət edən xəstələrə yardım edilib. Analiz nümunələri götürülüb. Xəstələrin mədə-bağırsaq yolları yuyulub və evə buraxılıblar.