İŞİD-ə qoşulan azərbaycanlıların məhkəməsi başladı

Bu gün Bakı Ağır Cinayətlər Məhkəməsində Suriyada Bəşər Əsədə qarşı döyüşlərdə iştirak etməkdə təqsirləndirilən Rufan Ağcabəyovun və Martin Vladimirin cinayət işi üzrə məhkəmə prosesi başlayıb.

Lent.az-ın məlumatına görə, hakim Əlövsət Abbasovun sədrliyi ilə keçirilən hazırlıq iclasında təqsirləndirilən R. Ağcabəyovun vəkili iştirak etməyib. Buna görə, hakim məhkəmə prosesini mayın 27-nə təxirə salıb.

Qeyd edək ki, hər iki şəxs Milli Təhlükəsizlik Nazirliyinin əməkdaşları tərəfindən tutulublar. Onlar Suriyada “İŞİD”, “Cəbhətül-Nusra” və “Cundu Şam” terrorçu təşkilatlarının fəaliyyətində iştirak etməkdə günahlandırılırlar.

Təqsirləndirilən şəxslər Cinayət Məcəlləsinin 279-cu (qanunvericilikdə nəzərdə tutulmayan silahlı birləşmə və ya qrup yaratma) və digər maddələrə əsasən ittiham olunurlar.