Qaxda mikroavtobus qəza törətdi, yaralılar var - FOTO - YENİLƏNİB

Qaxda baş vermiş yol qəzasının bəzi təfərrüatları məlum olub.

APA-nın yerli bürosunun məlumatına görə, Şəki rayon sakini Kamran adlı sürücü idarə etdiyi "Mercedes" markalı mikroavtobusla hərəkətdə olarkən nəqliyyat vasitəsini yol kənarında dayanmış "Mercedes" markalı minik avtomobilinə vurub. Nəticədə minik avtomobili yaxınlıqdakı işıq dirəyinə çırpılıb.

Qəza zamanı hər iki avtomobildə olan 5 nəfər müxtəlif dərəcəli bədən xəsarətləri ilə Qax Rayon Mərkəzi Xəstəxanasına yerləşdirilib. "Mercedes" markalı minik avtomobilində olan 4 nəfər Gəncə sakinləri müayinə edildikdən sonra xəsarətləri yüngül olduğundan ambulator müalicə üçün evə buraxılıblar. Mikroavtobusun sürücüsü Kamranın müayinəsi isə xəstəxanada davam etdirilir.

***

Saat 20:45

Qaxda iki minik avtomobili toqquşub, yaralılar var.

APA-nın şimal-qərb bürosunun məlumatına görə, hadisə axşam saatlarında Qax-İlisu avtomobil yolunun rayonun Qaxbaş kəndi ərazisindən keçən hissəsində baş verib.

İki minik avtomobilinin toqquşması nəticəsində beş nəfər xəsarət alıb. Yaralılar Qax Rayon Mərkəzi Xəstəxanasına aparılıblar. Hazırda yaralılara ilkin yardım göstərilir, şəxsiyyətləri dəqiqləşdirilir.

Faktla bağlı Qax Rayon Polis Şöbəsində araşdırma aparılır.