Hacıqabulda yanğın: 5 nəfər həlak oldu - VİDEO - YENİLƏNİB

Oktyabrın 12-də saat 1 radələrində Hacıqabul rayonunun Navahı qəsəbəsində taxta konstruksiyalı barak tipli yaşayış yerlərində yanğın baş verməsi barədə məlumat daxil olub.

Baş Prokurorluqdan Lent.az-a verilən xəbərə görə, Hacıqabul rayon prokurorluğunun əməkdaşları tərəfindən prokuror-kriminalist, Fövqəladə Hallar Nazirliyinin Əməliyyat-istintaq idarəsinin əməkdaşları və ekspertin iştirakı ilə dərhal hadisə yerinə baxış keçirilib, həmçinin zəruri və təxirəsalınmaz istintaq hərəkətləri icra olunub.

Hadisə nəticəsində 5 nəfər şəxs - 1944-cü il təvəllüdlü Mütəllim Məmmədov, 1952-ci il təvəllüdlü Sara Abışova, 1981-ci il təvəllüdlü Aybəniz Abışova, 2010-cu il təvəllüdlü Zəhra Sadıqova və 2012-ci il təvəllüdlü Elgün Sadıqov ölüb, 1 nəfər şəxs - 1963-cü il təvəllüdlü Şölə Həsənova xəsarət alıb.

Xəsarət almış şəxsə xəstəxanada ambulator tibbi yardım göstərilib və hazırda vəziyyəti stabildir.

Faktla bağlı Hacıqabul rayon prokurorluğunda Cinayət Məcəlləsinin 314.3-cü (ehtiyatsızlıqdan iki və daha çox şəxsin ölümünə səbəb olan səhlənkarlıq) maddəsilə cinayət işi başlanaraq ibtidai istintaq aparılır.

***
Saat: 04:08

Hacıqabul rayonunun Navahı qəsəbəsində ikimərtəbəli yataqxana binasında baş vermiş yanğın Fövqəladə Hallar Nazirliyinin yanğından mühafizə bölmələri tərəfindən söndürülüb.

Bu barədə Lent.az-a FHN-dən bildirilib.

***

03.13

Fövqəladə Hallar Nazirliyinin (FHN) "112" qaynar telefon xəttinə Hacıqabul rayonunun Navahı qəsəbəsində ikimərtəbəli yataqxana binasında yanğın olması barədə ilkin məlumat daxil olub.

Lent.az xəbər verir ki, məlumatla əlaqədar FHN-nin Dövlət Yanğından Mühafizə Xidmətinin yanğından mühafizə bölmələri çağırış üzrə cəlb olunub.

Hazırda yanğınsöndürmə işləri davam edir.

Əlavə məlumat veriləcək.

***

02.53

Hacıqabuldakı yanğlının bəzi təfərrüatları məlum olub.

Lent.az APA-ya istinadla xəbər verir ki, hadisə nəticəsində Abışova Aybəniz Yolçu qızı (1981), Abışova Sara (1950), Sadıqova Zəhra Elçin qızı (2010), Sadıqov Elgün Elçin oğlu (2012), Mahmudov Mütəllim Əliyar oğlu (1943) yanğın nəticəsində həlak olub.

Daha 2 nəfər yanıq xəsarətləri ilə xəstəxanaya yerləşdirilib. Hazırda onların adları dəqiqləşdirilir.

***

02.44

Xəbərə foto və video əlavə olunub.

***

02.32

Hacıqabul rayonunun Navahı kəndində yanğın baş verib.

Lent.az APA-ya istinadla xəbər verir ki, yanğın nəticəsində yaşayış evinin damı uçub. Hadisə zamanı 5 nəfər ailə üzvü də evdə olub. Qohumların eddiyinə görə onlar yanğında həlak olub.

Hadisə yerinə 3 yanğınsöndürən avtomobil cəlb olunub. Güclü külək alovla mübarizəyə mane olur. Hazırda yanğın lokallaşdırılıb.