Ağaclar kökündən çıxdı, elektrik və qaz xətlərinə ciddi ziyan dəydi – GÜCLÜ KÜLƏK

Şimal-qərb bölgəsində keçən qeyri-sabit hava şəraiti bir sıra fəsadlar törədib.
APA-nın şimal-qərb bürosunun məlumatına görə, bu gün saat 4 radələrindən başlayaraq ölkənin şimal-qərb bölgəsində qeyri-sabit hava şəraiti hökm sürüb.

Bölgənin Balakən və Zaqatala rayonları ərazisində güclü küləklə müşahidə edilən yağışlı hava şəraiti olub. Güclü külək nəticəsində Balakən rayonunun Qazbinə kəndi, Zaqatala rayonunun isə Makov kəndi ərazisində iri gövdəli ağaclar yıxılıb.
Elektrik naqillərinin qırılması səbəbindən hər iki rayonun bir sıra yaşayış məntəqələrinə elektrik enerjisinin verilməsində fasilələr yaranıb.

Zaqatalanın Makov kəndində ağac yolu bağlaması səbəbindən ətraf kəndlərə nəqliyyatın hərəkəti müvəqqəti dayanıb. Aidiyyəti qurumlar və kənd sakinlərinin köməkliyi ilə qısa müddətdə yol təmizləndikdən sonra avtomobillərin hərəkəti yenidən bərpa edilib.

Elektrik enerjisinin verilməsində yaranan fasilələr axşam saatlarına aradan qaldırılıb.
Hazırda bölgədə yağışlı hava şəraiti davam edir.

Gəncədə isə yağışla müşahidə olunan güclü külək fəsadlar törədib. Bu gün axşam saatlarından başlayan külək nəticəsində şəhərin bəzi ərazilərində iri gövdəli ağaclar aşıb.

Bir neçə küçədə ağacın aşması nəticəsində elektrik və qaz xətləri sıradan çıxıb.

Şəhərin bəzi ərazilərində qaz və elektrik enerjinin verilməsində fasilə yaranıb.
Həmin ərazilərə aidiyyəti qurumların əməkdaşları cəlb olunub və yaranmış fəsadların aradan qaldırılması istiqamətində işlər aparılır.

Qeyd edək ki, hazırda Gəncə şəhəri ərazisində yağışla müşahidə edilən küləkli hava davam edir.