Rüstəm Usubov səhhətində yaranmış problemlə bağlı Minskdə müalicə alıb

“Baş prokurorunun birinci müavini Rüstəm Usubovun səhhəti ilə bağlı dərc olunmuş məlumatı həqiqətə uyğun olmayan, etik davranış tələblərini pozan yazı kimi qiymətləndiririk”.

Bu barədə Baş Prokurorluğun yaydığı açıqlamada bildirilir. Baş Prokurorluqdan Lent.az-a göndərilən açıqlamada qeyd olunub ki, həqiqətən, Belorus Respublikasında səfərdə olarkən iştirak etdiyi beynəlxalq tədbir başa çatdıqdan bir neçə saat sonra səhhətində yaranmış problemlə əlaqədar baş prokurorun birinci müavini Rüstəm Usubov Minsk şəhərində tibb müəssisəsinə müraciət etməklə müvafiq müalicə alıb və yaxın günlərdə xidməti vəzifələrinin icrasına başlayacaq: “Bu məsələ ilə əlaqədar Baş Prokurorluğun rəsmi mövqeyi öyrənilmədən və jurnalist etikası qaydaları pozulmaqla yazılan qeyd olunan məlumat ictimai rəyi çaşdırmaq və ucuz sensasiya yaratmaq məqsədi daşıyır”.

Qeyd edək ki, “musavat.com” bu gün “Rüstəm Usubov Minskdə tədbirdə yıxıldı” başlıqlı xəbər yayıb. Xəbərdə R.Usubovun çıxş zamanı yıxıldığı, onun infarkt keçirdiyi, 1 həftədir, reanimasiya şöbəsində saxlandığı bildirilir.