Qubada xalça oğruları tutulub

Quba rayonunda xalça oğurlayan iki nəfər saxlanılıb. Quba rayon Polis Şöbəsinin İstintaq və Təhqiqat Bölməsinin müstəntiqi Əsgər Kazımov Lent.az-a bildirib ki, saxlanılan şəxslər Qırmızı Qəsəbə sakini Zoya Yuşvayeva məxsus evdən ümumi dəyəri 1000 manat olan 3 ədəd xalça oğurlayıblar.

Polis əməkdaşlarının keçirdikləri əməliyyat-axtarış tədbirləri nəticəsində hadisəni törətməkdə şübhəli bilinən şəxslər müəyyənləşdirilərək məsuliyyətə cəlb olunublar.

Oğurluq edənlər 25 yaşlı Təyyar Bədirxanov və Xaçmaz rayonunun Mehrəli Qışlaq kənd sakini Elşad Fəttahovdur. Əsgər Kazımovun sözlərinə görə, onlar 3 xalçadan ikisini Bakıda satıblar, digərini isə satmağa onlara polis əməkdaşları mane olublar.

Təqsirləndirilən şəxslər istintaqa verdiyi ifadələrində hadisəni maddi ehtiyac üzündən etdiklərini bildiriblər.

Faktla bağlı rayon polis şöbəsində AR CM-nin 177-ci maddəsinin müvafiq bəndləri ilə cinayət işi başlanılıb, araşdırma aparılır.

Vəli Turan