Hərbçilərin ölümünü araşdırmaq üçün vəzifəli şəxslərdən ibarət qrup yaradılıb

Müdafiə Nazirliyi və Hərbi Prokurorluq 7 hərbçinin ölümü ilə bağlı daha bir birgə məlumat yayıb.

Nazirliyin mətbuat xidmətindən Lent.az-a daxil olan məlumatda bildirilir ki, fevralın 20-də saat 09.40 radələrində Müdafiə Nazirliyinin hərbi hissələrinin birində ölümlə nəticələnən ağır cinayət hadisəsi baş verib. Müdafiə Nazirliyi və Hərbi Prokurorluğun rəhbər işçiləri daxil olmaqla bir qrup əməkdaş hadisə yerinə ezam olunublar. Fakta görə Cinayət Məcəlləsinin 120.2.7-ci (iki və daha çox şəxsi qəsdən öldürmə) maddəsi ilə cinayət işi başlanılıb.

“Hadisənin baş vermə səbəbləri və şəraiti birgə istintaq əməliyyat qrupu tərəfindən aparılmaqla zəruri, təxirəsalınmaz istintaq hərəkətləri həyata keçiriləcək. Cinayət işi üzrə hərtərəfli, tam və obyektiv istintaq aparılması, hadisənin baş verməsində günahkar olan şəxslərin müəyyən edilib məhkəmə məsuliyyətinə verilməsi və qanunla nəzərdə tutulan başqa tədbirlərin görülməsi təmin olunmaqla ictimaiyyətə əlavə məlumat veriləcək” – deyə, məlumatda qeyd olunub.