Gəmi partlayışında 1 nəfərin öldüyü, 6 nəfərin yaralandığı məlum olub

5 saylı Şəhər Xəstəxanasından Lent.az-a verilən məlumata görə, 43 yaşlı Aslanov Sabir Rüstəm oğlu və 43 yaşlı Xıdırov Qeysəddin Cəmil oğluna ambulator müalicə təyin edilib.

Daha iki yaralı isə 1 saylı Şəhər Xəstəxanasına yerləşdirilib. Bunlar daha ağır travma almış Yurka Qarayev və Şaiq Mirzəyevdir. Onların hər ikisi reanimasiyaya yerləşdirilib və müxtəlif diaqnozlar qoyulub.

Y.Qarayevin oğlu Raqif Qarayev isə gecə saatlarında aldığı xəsarətlərdən Travmatologiya İnstitutunda dünyasını dəyişib. İnstituta gətirilən daha iki nəfərə isə ambulator müalicə yazılıb.

Qeyd edək ki, hadisə şahidlərinin Lent.az-a verdiyi məlumata görə, 6-cı mədən yaşayış massivində təmirə dayanmış “Şirvan” yük gəmisində qaynaq işləri zamanı qaz sızması səbəbindən partlayış olub.