Nadir hadisə: Naxçıvanda 2720 metr yüksəklikdə qızılgül bitib

Naxçıvan Muxtar Respublikasının (NMR) Culfa rayonu ərazisində dəniz səviyyəsindən 2720 metr yüksəklikdə qızılgül bitir. Lent.az-ın məlumatına görə, bu nadir hadisəyə rayonun ucqar Boyəhməd kəndinin cənub-şərqində yerləşən Göydağın zirvəsində rast gəlinir.

Yaşlı kənd sakinləri dağın zirvəsində, adi bir kol bitkisinin belə olmadığı yerdə əsrlərdir qızılgül kollarının bitməsini ərazidə yerləşən Göydağ pirinin kəraməti ilə əlaqələndirirlər. Bir damla suya belə rast gəlinməyən zirvədə bitən qızılgül həm də Zəngəzur silsiləsində yerləşən Qırxlar pirinə istiqamətlənib.

Göydağın zirvəsi həm də Boyəhməd kəndindən qiblənin istiqamətində yerləşir. İnanclara görə, qızılgülün bitdiyi ərazidə “yeddi müqəddəs” uyuyur. Hər il ziyarətgaha gələnlər niyyət edib, qurban kəsirlər.

Fariz YUNİSLİ