Külək dəmiryolunda qatarları dayandırdı - YENİLƏNİB

Bu gecə bölgələrdən paytaxta gələn yük və sərnişin qatarlarının hərəkətində məcburi dayanmalar baş verib.

“Azərbaycan Dəmir Yolları” Qapalı Səhmdar Cəmiyyətinin mətbuat katibliyinin rəisi Nadir Əzməmmədov Lent.az-a bildirib ki, dünən səhərdən ölkə ərazisində müşahidə olunan güclü külək dəmir yolu təsərrüfatına da ziyan vurub. Belə ki, Qaradağ-Puta mənzilində təmas xətlərinin qırılması nəticəsində dəmir yolunda qatarların hərəkəti dayanıb. Nəticədə bu gün səhər saatlarında Bakıya çatmalı olan qatarlar təxminən bir saat gecikib və onların hamısı artıq mənzil başına yetişiblər. Həmçinin paytaxtdan əks istiqamətə gedən qatarların da hərəkətində dayanmalar olub. Belə ki, Bakı-Balakən, Bakı-Tiflis və Bakı-Qazax sərnişin qatarları hələ də mənzil başına çatmayıb.

Nadir Əzməmmədov deyib ki, artıq bölgələrdən Bakıya gələn qatarlar 1-1,5 saat gecikmə ilə mənzil başına çatıb. Hərəkətində ləngimələr olmuş digər qatarlar isə artıq yoluna davam edir. Onun sözlərinə görə, ləngiyən qatarlar qrafikdə nəzərdə tutulduğundan təxminən 1 saat gecikmə ilə mənzil başında olacaq.

N.Əzməmmədov deyib ki, dünən qırılmanın baş verdiyi ərazidə küləyin sürəti saniyədə 35 metrə çatıb. Normal halda bu rəqəm 25 m/san olmalıdır. Ərazi burulğan zonası sayıldığından təmas xətləri güclü küləyə tab gətirməyib.

Elxan SALAHOV