Yataqxanada baş verən partlayışla əlaqədar cinayət işi başlanıb

Bu barədə APA-ya açıqlamasında işin istintaqını araşdıran Yasamal rayon Prokurorluğunun müstəntiqi Mübariz Əsədov məlumat verib. O, qeyd edib ki, hadisə zamanı 1 nəfər ölüb, 7 nəfər isə müxtəlif dərəcəli bədən xəsarətləri alıblar. Yataqxanadakı yanğının qaz balonunun partlaması nəticəsində meydana gəldiyini qeyd edən M. Əsədov faktla bağlı Cinayət Məcəlləsinin 124-cü (ehtiyatsızlıqdan insan ölümünə səbəb olma) maddəsi ilə cinayət işinin başlandığını vurğulayıb: “Hazırda başlanmış cinayət işi üzrə zəruri istintaq hərəkətləri davam etdirilir. Baş vermiş hadisə ilə bağlı hələlik saxlanılan yoxdur”.

Qeyd edək ki, məlum yanğın hadisəsi fevralın 4-də axşam saatlarında, Yasamal rayonu, Şərifzadə küçəsində 1 ünvanında yerləşən, İnşaat Universitetinə məxsus yataqxanada qeydə alınıb. Hadisə yerinə 15 yanğınsöndürən maşın cəlb edilib. Yataqxanada olan şəxslər evikuasiya edilib. Həyata keçirilən tədbirlər nəticəsində yanğının qarşısı alınıb.

Məlumata görə, yanğından əvvəl yataqxananın otaqlarından birində güclü partlayış olub. Nəticədə həmin otaqda məskunlaşan məcburi köçkün Rəhman Cəfərov dünyasını dəyişib. Hadisə zamanı daha 7 nəfərin xəsarət aldığı bildirilir.