Xaçmazda “paytaxt salatı”ndan kütləvi zəhərlənmə

Xaçmaz rayonunun Xudat şəhərində kütləvi zəhərlənmə halı qeydə alınıb. APA-nın şimal bürosunun xəbərinə görə, ötən gecə saatlarından başlayaraq, zəhərlənmə diaqnozu ilə Xudat şəhər Xəstəxanasına müraciətlər edilib. Müraciət edənlərin sayı 30-dan çoxdur.
Zəhərlənmə halının Xudatda restoranda keçirilən toyda baş verdiyi bildirilir.

Xudat şəhər Xəstəxanasının baş həkimi Qədir Hüseynov APA-ya bildirib ki, müraciət edənlər əsasən qadınlardır. Aparılan laborator müayinələrin ilkin nəticələrinə görə, zəhərlənməyə toyda verilən “paytaxt salatı” səbəb olub.

Hazırda xəstəxanaya zəhərlənmə diaqnozu ilə müraciətlər davam etməkdədir.

Xəstəxananın cərrahiyyə və terapiya şöbələrinin xəstələrlə dolduğu bildirilir.
Bu səbəbdən Xaçmaz Mərkəzi Rayon Xəstəxanasına yardım üçün müraciət olunub.

Faktla bağlı rayonun hüquq-mühafizə orqanları tərəfindən araşdırma aparılır.