Quba polisi 4 dostu bir-birindən ayırdı

Quba rayon Polis Şöbəsinin əməkdaşlarının keçirdikləri əməliyyat axtarış tədbirləri nəticəsində narkotik vasitələrdən istifadə edən 4 rayon sakini saxlanılıb. Öncə Quba şəhər sakini 25 yaşlı Natiq Məmmədov saxlanılıb. Ondan çəkisi 1.11 qram marixuana aşkar olunaraq götürülüb. Natiq polis şöbəsində narkotik vasitəni dostu 33 yaşlı Murad Səttarovdan aldığını bildirib. Polis əməkdaşları Muradın üzərinə baxış keçirən zaman onun üzərindən 6.92 marixuana tapıblar. Murad da narkotiki dostu Samir Mirzəyevdən aldığını təsdiqləyib. Samir Mirzəyevin isə narkotik vasitəni digər dostu Sadıq Talıbovdan aldığı müəyyənləşib.

Quba rayon Məhkəməsinin qərarı ilə 4 dost barəsində həbs qətimkan tədbiri seçilib. Quba RPŞ-nin İstintaq Bölməsinin rəisi Vüqar İsmayılov Lent.az-a bildirib ki, faktla bağlı Azərbaycan Respublikasının Cinayət Məcəlləsinin müvafiq maddələri ilə cinayət işi açılıb, araşdırmalar davam etdirilir. Təqsirləri sübuta yetirilərsə dostlar ən azı 3 il bir-birindən ayrı düşəcəklər.

Vəli Turan