Bazardakı yanğın söndürüldü

APA-nın hadisə yerində olan əməkdaşının verdiyi xəbərə görə, yanğın bazarın 1000 kvadratmetrə yaxın hissəsini əhatə edib. Yanğın aradabir partlayışla müşahidə olunur.

Nizami rayon Polis İdarəsindən APA-ya verilən məlumata görə, hadisəyə bazarın tikinti materialları satılan hissəsindəki dükanlardan birində elektrik naqilində baş vermiş qısaqapanma səbəb olub.

Hadisə ilə bağlı polisə və Fövqəladə Hallar Nazirliyinin müvafiq qurumuna bazarın təhlükəsizlik xidmətindən məlumat daxil olub.

Polisin ilkin araşdırmasına görə, hadisə nəticəsində 1000 kvadrat metrdən çox ərazi yanıb.

Yanğın zamanı ölən və xəsarət alan olmayıb.

Hazırda Fövqəladə Hallar Nazirliyinin qüvvələri əraziyə cəlb olunub, onlar yanğının qarşısını almağa çalışırlar.

Saat 23.50 radələrində isə yanğın söndürülüb. Bundan sonra bazarda ticarət obyektləri olan şəxslərə əraziyə daxil olmağa icazə verilib.

APA-nın hadisə yerindəki əməkdaşının məlumatına görə, bazarın tikinti malları satılan ərazisindəki bütün obyektlərə böyük məbləğdə ziyan dəyib.