Türkiyədə azərbaycanlı biznesmeni qarət edən 3 həmyerlimiz tutuldu

Türkiyədə Azərbaycan əsilli iş adamını elə azərbaycanlılar qarət ediblər.

Lent.az-ın “memlekethaber.com” saytına istinadən verdiyi məlumata görə, İstanbulda bir bankdan 178 min dollar çıxaran iş adamı Bəxtiyar Cəfərov onu izləyən Hüseyn A, Nazim B. və Kənan B. tərəfindən bıçaq və tapança ilə təhdid edilib.

Pulla dolu çantanı alaraq Kumkapı istiqamətində qaçmağa başlayan Hüseyn A.nı izləyən Bəxtiyar Cəfərov ətrafdakı insanlardan yardım istəyib. İnsanların köməyi ilə Hüseyn A. Kumkapı Polis İdarəsinin yanında yaxalanıb. Nazim B. və Kənan B. də qısa müddət sonra polis tərəfindən saxlanılıblar.

Polis bildirib ki, Bəxtiyar Cəfərov bir gün öncə bankdan çıxarkən telefonla danışıb və rus dilində “pul sabah gələcək, o zaman götürəcəm” sözlərini dilə gətirib. Bunu da yuxarıda adları çəkən azərbaycanlılar eşidib və onu izləməyə başlayıblar.