Azərbaycan şirkəti Dubay Torpaq Departamentini və ərəb sahibkarlarını məhkəməyə verib

APA-nın xəbərinə görə, Azərbaycanda fəaliyyət göstərən “Eco Qroup” şirkəti iddia ərizəsi ilə 1 saylı Bakı Yerli iqtisad Məhkəməsinə müraciət edərək, Dubay Torpaq Departamentinə və 2 ərəb sahibkarına qarşı ziyanın ödənilməsi tələbi ilə iddia qaldırıb.

İddiaya əsasən, “Eco Qroup” şirkəti Dubayda torpaq almaq istəyib. Bu zaman Azərbaycanda sahibkarlıqla məşğul olan İssam Muhammed Davud və Şeyx Tarık Feysal Xalid Əl Qasimi ona torpaq almaqda köməklik edəcəklərini bildiriblər. Alınan torpağın pulu ödənildikdən sonra departament torpağı satmaqdan imtina edərək, müqaviləni ləğv edib və şirkətin pulun bir hissəsini geri qaytarmayıb. Nəticədə şirkətə maddi ziyan dəyib. Buna görə də şirkət məhkəməyə müraciət edib.

İddia əsasında məhkəmə prosesin ilkin hazırlıq iclası oktyabrın 13-də hakim Müseyib Bayramovun sədrliyi ilə keçiriləcək.