Faiq Ağayevdən gözlənilməz addım - EKSKLÜZİV

Azərbaycanın xalq artisti Faiq Ağayev bu gün – oktyabrın 1-də mətbuat konfransı keçirəcək. Xalq artistinin mətbuat xidmətindən eksklüziv olaraq Lent.az-a verilən məlumata görə, mətbuat konfransı, ilkin məlumata əsasən, saat 17-18 arası F.Ağayevin müalicə olunduğu Kliniki Tibbi Mərkəzdə keçiriləcək.

Məlumatda bildirilir ki, müğənni jurnalistlərə sentyabrın 27-də baş vermiş hadisə barədə açıqlama verəcək.

Qeyd edək ki, sentyabrın 27-də səhər saatlarında müğənni və onun iki mühafizəçisi Bakının “Kubinka” adlanan ərazisində bıçaqlanmışdılar. F.Ağayev həmin hadisə zamanı 6 bıçaq yarası almışdı. Müğənni və mühafizəçiləri Kliniki Tibbi Mərkəzdə əməliyyat olunublar.

Hadisəni törədən şəxslər saxlanılaraq, cinayət məsuliyyətinə cəlb olunublar. Nəsimi rayon Polis İdarəsində başlanmış cinayət işi üzrə ilkin təhqiqat mərhələsi başa çatıb, iş prokurorluğa təhvil verilib.

Lalə Yusifqızı