Xuliqanlıqda təqsirləndirilən Gəncə sakini saxlanılıb

Xuliqanlıqda təqsirləndirilən Gəncə sakini saxlanılıb. “Gəncə Bazar” ASC-nin xidmətçi işçisi əvvəllər bazarda işləyən digər işçini döyüb. Bu barədə Lent.az-ın Gəncəbasar müxbirinə Gəncə şəhər Polis İdarəsindən bildirilib.

Məlumata görə, Gəncə şəhər sakini Bayram Məhərrəmov 2010-cu ilin aprel ayına kimi Gəncə bazarında işləyib, sonra işdən azad edilib. Məhərrəmov Bayram Novruz oğlu “Gəncə Bazar” ASC-nin idarə heyətinə yenidən işə bərpa olunması barədə müraciət edərkən, yaranan mübahisə zamanı ticarət mərkəzinin xidmətçisi işləyən, ancaq özünü bazarın rəhbəri kimi qələmə verən 1980-ci il təvəllüdlü Gəncə şəhər sakini İsmayılov Əli Kamal oğlu ona qarşı zor tətbiq edib. Əli İsmayılov Bayram Məhərrəmovu döyərək, ona əlində olan əşya ilə xəsarət yetirib.

Bundan sonra xəsarət almış şəxs hüquq-mühafizə orqanlarına şikayət ərizəsi ilə müraciət edib. Əli İsmayılov polis tərəfindən saxlanılıb. Faktla bağlı Azərbaycan Respublikası Cinayət Məcəlləsinin 221.3-cü (xuliqanlıq) maddəsi ilə iş açılıb, araşdırma aparılır.

Vüsalə Cənnətova