Yaxınları Faiq Ağayevin yanına ziyarətçi gəlməsini istəmirlər

“Faiq Ağayevin vəziyyəti hazırda çox yaxşıdır, gəzir, yeyir-içir. Hər şey yaxşıdır. Əslində o, dünəndən etibarən palataya köçürülə bilərdi. Lakin qardaşı xahiş etdi ki, hələlik reanimasiyada qalsın, çünki yanına ziyarətçilərin gəlməsini hələlik istəmir”.

Bu barədə Lent.az-a xalq artisti Faiq Ağayevin meneceri Natəvan Mirzəyeva məlumat verib.

“Vəziyyəti yaxşıdır, amma xeyli insan onu görmək istəyir. Buna görə də Faiq Ağayev telekanallardan birinə bir-iki kəlmə danışdı ki, sevənləri televiziya vasitəsi ilə artıq səhhətinin normallaşmağa doğru getdiyini bilsin və narahat olmasınlar. Onu da xüsusi vurğulayım ki, bu, onun mətbuata yeganə açıqlamasıdır”, - deyə o, bildirib.

Meneceri müğənninin böyük ehtimalla bu gün də reanimasiya şöbəsində qalacağını diqqətə çatdırıb.

Lalə Yusifqızı