Güclü külək Ucara ciddi ziyan vurub

APA-nın yerli bürosunun xəbərinə görə, külək rayon mərkəzində, Dədə Qorqud küçəsində yerləşən binanın dam örtüyünü tamamilə atıb. Binada 12 ailənin yaşadığı bildirilir. Güclü külək Ucar Rayonlararası Təchizat Bazasında yerləşən binaların dam örtüyünü də atıb, orada olan texnikaya ciddi ziyan dəyib.

Ucar rayon İcra Hakimiyyəti başçısının birinci müavin, Fövqəladə Hallar Komissiyasının sədri Əbil Mehdiyevin APA-ya verdiyi məlumata görə, rayon üzrə elektrik enerjisinin verilişi dayandırılıb. Külək elektrik dirəklərini də aşırıb, ağaclar qırılaraq elektrik naqillərinin üzərinə düşüb. Hazırda problemin aradan qaldırılması üçün səylər göstərilir.
Xəsarət alan yoxdur.

Məlumata görə, Göyçay rayonunda da güclü külək müşahidə olunub. Göyçay Fövqəladə Hallar Komissiyasından APA-ya rayonda dağıntı olmadığı bildirilib.