Torpaq üstündə qardaş qardaşı öldürdü

Bərdədə baş vermiş qanlı hadisə barədə Baş Prokurorluq və DİN məlumat yayıb

İyunun 22-də Bərdə rayonunda qardaş qardaşı öldürüb. Lent.az-ın Daxili İşlər Nazirliyinin (DİN) mətbuat xidmətinə istinadən verdiyi məlumata görə, 43 yaşlı Rizvan Məmmədov ailə münaqişəsi zəminində qardaşı 50 yaşlı Mehman Məmmədovu
ov tüfəngi ilə vurub.

Rizvan Məmmədov daha sonra “QAZ 21” markalı avtomobillə hadisə yerindən qaçıb.

Lent.az-ın Baş Prokurorluğun rəsmi saytına istinadən verdiyi məlumata görə, Bərdə Rayon Mərkəzi xəstəxanasına yerləşdirilən Mehman Məmmədovun həyatını xilas etmək mümkün olmayıb. Prokurorluq hadisənin həyətyanı torpaq sahəsi üstündə düşən mübahisə səbəbindən baş verdiyini bildirir.

Rayon prokurorluğunun və rayon Polis Şöbəsinin əməkdaşları tərəfindən hadisə yeri və meyitə məhkəmə-tibbi ekspertin iştirakı ilə baxış keçirilib, fotoşəkillər çəkilib, iş üçün əhəmiyyət kəsb edən maddi sübutlar, o cümlədən cinayətin aləti olan tüfəng götürülüb.

Faktla bağlı Azərbaycan Respublikası Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanılıb. Cinayəti törətməkdə şübhəli şəxs qismində saxlanılan R. Məmmədov ilkin ifadəsində törətdiyi cinayət əməlini tam etiraf edib.

Vüqar Baba